La Seminci estrena «Muyeres», una semeya de les últimes guardianes de la tradición oral asturiana

Muyeres, la segunda película y el debú en solitariu de la directora zaragozana Marta Lallana, llegó esti llunes a la 68 edición de la Selmana Internacional de Cine de Valladolid (Seminci) depués de llevar el Premiu especial del xuráu y el Premiu a la meyor cinematografía nel Festival de Shanghái.

La cinta, de 77 minutos de duración, ye una película «híbrida» qu'entemez lo real cola ficción pa narrar les vivencies de Constantina y Irene, les últimes guardianes d'una tradición oral milenaria condenada a desaparecer al traviés d'un cantar a la belleza de la urxencia que destaca a toles muyeres que lleven consigo ayalgues del pasáu, filmando la so identidá y la so tradición musical, con una banda sonora contemporánea firmada por Raül Refree.

Tomando como escenariu los montes asturianos de Cangas de Narcea, el filme céntrase nun llugar onde'l tiempu se detién. Ellí, ente lo real y lo fantástico, habiten muyeres que caltienen vieyos cantares, bisarmes enmazcaritaes que baillen embaxo la lluna y delles lleendes que se cuenten alredor del llar.

Un día, un visitante llega a l'aldea con un aparatu de grabación que tien rexistraos los cantares vieyos d'eses muyeres. Enchipáu coles sos voces necesita conoceles.

Estrenóse mundialmente el mes de xunu nel Festival de Shanghái onde se llevó'l Premiu especial del xuráu y el Premiu a la meyor cinematografía. La proyección en Seminci foi el so estrenu nacional.

L'actor y compositor del llargumetraxe, Raül Refree, viaxó a les aldees d'Asturies axuntando cantares tradicionales y treslladó a Lallana la «importancia y urxencia» de retratar eses últimes muestres del cante nuna película, según la nota de prensa de producción de la película.

Dambos yá collaboraren na primer película de Marta, pero nesta ocasión la collaboración va más allá, porque Muyeres ye una película híbrida qu'entemez lo real cola ficción. Nos valles asturianos hai aldeines poblaes por muyeres vieyes, viudes y soles, últimes guardianes d'una tradición bien antigua: la tresmisión oral de cantares, romances y lleendes de madres a fíes dende hai cientos d'años.

Toes elles, ensin necesidá de conocese, conecten coles mesmes alcordances cuando canten. Cantares que tresporten a l'alcordanza d'abrir la ventana y escuchar a les paisanes cantar, agora namás silenciu y ecu d'una vida d'antepasaos más conectada cola naturaleza, arrogante, colectiva y, p'acabar, más humana.

Con estes muyeres non namás muerren estos cantares sinón tamién tola so cosmoloxía. Tamién se pierde tamién parte del pasáu y polo tanto de la identidá. Nesta película, Marta Lallana retrata les últimes muestres que nos conecten con esta otra vida. El so procesu de creación llevóla hacia la difícil busca de dalgo que yá malapenes existe y Lallana escribió'l guión inspirada en poder caltener la fraxilidá d'esi mundu que ta a un tris de desaparecer.

Ye por eso, que la figura de Raül, el foriatu qu'entra nesti universu, actúa como reflexu del procesu que tanto Marta como'l mesmu Raül Refree vivieron, informa Europa Press.