«Xuan Soldáu» inaugura la fase competitiva del festival de teatru Nel Amaro
Agora
El vienres, 6 d'ochobre entama el concursu del VII Premiu col primer finalista, Carlos Alba y la versión actualizada del cuentu de Fernán Caballero, que destaca pol usu de les marionetes
04 Oct 2023. Actualizado a las 17:41 h.
El vienres, 6 d'ochobre entama la fase competitiva del VII Premiu Nel Amaro, col primer finalista, Carlos Alba, y la obra Xuan Soldáu, versión actualizada del cuentu de Fernán Caballero, que destaca pol usu de les marionetes, y que va dirixida a tol públicu, n'especial al de 6 a 12 años.
El premiu Nel Amaro ta convocáu pola viceconseyería de Cultura, Política Llingüística y Deporte nel contestu de los premios lliterarios y artísticos en llingua asturiana o gallego-asturianu, y pueden presentase a él empreses del sector profesional dedicaes a la producción y representación d'espectáculos teatrales.El Teatru Filarmónica d'Uviéu va acoyer les representaciones, con entrada llibre y de baldre hasta completar aforu. Les representaciones, aptes pa tolos públicos y empobinaes a un públicu familiar, van empezar a les 18.00 hores.
El festival dispón d'una web, www.festivalnelamaro.com, onde se pueden consultar tolos detalles de les funciones y de les obres, como la sinopsis, la ficha técnica o la trayectoria de la compañía. Amás, la web recueye tamién información sobre los ganadores d'otros años, incluyendo enllaces a versiones audiovisuales de les obres Hansel y Gretel (Premiu Nel Amaro 2018) y El viaxe de Covaletti (Premiu Nel Amaro 2020). Amás, tamién se pueden atopar recursos didácticos sobre estes obres pa usar en contestos educativos.
El Premiu Nel Amaro de Teatru Profesional, dotáu con 6.000 euros, convócase cola mira d'afianzar, arriquecer y prestixar la llingua asturiana y el gallego-asturianu nel ámbitu del arte dramáticu. Amás, el Principáu promueve la representación de la obra a lo llargo del territoriu al traviés del programa Autores nel Camín. El premiu y el festival lleven el nome del autor turonés Nel Amaro (1946-2011), consideráu una referencia fundamental na vanguardia teatral n'asturianu. Nel Amaro foi amás l'autor al que se dedicó la edición de la Selmana de les Lletres Asturianes nel 2021, informa Europa Press.