Vuelven los talleres «Pa que nun t'aburras» nos barrios populares d'Avilés

Pa toles edades y nos barrios d'Avilés -de La Xungarosa/El barrio de La Luz, La Carriona y Los Canapés- vuelven los talleres infantiles n'asturianu «Pa que nun t'aburras» y vuelven con «Cuentos con munchu arte», conducíos pola educadora infantil Rosa Cuervo, y van facese n'ochobre y payares.

Los talleres que se van dar son pa neñes y neños de 4 a 8 años. N'ochobre, el turnu ye de «Bruxes males, bones bruxes», de Francisco Pimiango; y en payares llegará «Un nataliegu perbullindiegu», de Vitu Pintado y Berto Peña.

En «Bruxes males, bones bruxes» asoleyaránse los secretos meyor guardaos de les recetes d'hai milenta años colos que se van poder preparar remedios maraviyosos y pócimes máxiques, con ingredientes que faen plasmar, como lombardes, vinagre y otros productos naturales. Dempués van, siguir pasándolo bien con papel y cartón, faciendo bruxes pa llevar pa casa...

En «Un nataliegu perbullindiegu», con palos de madera, rosquielles y llazos deprenderán a construyir y iguar un ramu tradicional de Navidá, anunciando les feches tan naguaes polo más piquiñino de la casa.

David García, conceyal de Normalización Llingüística d'Avilés, la conceyala de Mocedá, Raquel Ruiz, acompañaos pola educadora infantil Rosa Cuervo, d'Aladanza, Educación y Tradición, que sedrá quien los dea, presentaron los talleres esti llunes.

Los talleres, con 15 places caún pa cada centru, sedrán dende les 18.00 a les 19.30 hores. El plazu p'apuntase yá ta abiertu, y puede facese diendo a les biblioteques de cada centru cultural, per WhatsApp al númberu 634 821 613, per corréu electrónicu na direición estayallingua@aviles.es o per teléfonu nel 985 545 508.

Calendariu

«Bruxes males, bones bruxes»

• 6 d'ochobre. La Xungarosa/El barrio de La Luz
• 20 d'ochobre. Los Canapés
• 27 d'ochobre. La Carriona

«Un nataliegu perbullindiegu»

• 10 de payares. La Carriona
• 17 de payares. La Xungarosa/El barrio de La Luz
• 24 de payares. Los Canapés