L'asturianu va poder usase nel Congresu, pero los diputaos van tener qu'autotraducise

El Congresu va cuntar dende la selmana viniente colos auriculares necesarios pa que tolos presentes nel hemiciclu puedan entender a los oradores qu'usen el gallegu, catalán o euskera. Eso sí, si dalgún quier utilizar l'asturianu o l'aranés va tener qu'autotraducise.

La Mesa del Congresu adoptó esti miércoles un alcuerdu, col votu en contra del PP, pa que les llingües cooficiales puedan utilizase nel hemiciclu yá dende'l martes viniente, enantes de que s'apruebe la reforma del Reglamentu del Congresu que se rexistró con esti oxetivu.

Asina, los diputaos que quieran yá van poder utilizar estos idiomes nel debate de toma en consideración d'esa reforma reglamentaria, que va ser l'únicu puntu del Plenu del orde del día que se va celebrar la selmana que vien.

Fontes parllamentaries esplicaron que la traducción del catalán, el gallegu y l'euskera va tar garantizada porque'l Congresu va contratar a los traductores que considere afayadizos y que yá veníen trabayando nel Senáu.

Con esta decisión, el PSOE y Sumar dan cumplimientu al anunciu que realizó la presidente del Congresu, Francina Armengol, nel discursu que pronunció depués de la so elección el 17 d'agostu pasáu, cuando aseguró que les llingües cooficiales van poder utilizase dende esi mesmu momentu.

L'usu del catalán, el gallegu y el euskera foi la condición que los grupos independentistes d'ERC y Junts punxeron al PSOE p'apoyar la elección de Armengol y garantizar asina una mayoría progresista na Mesa de la Cámara, informa Europa Press.