Asaja alvierte de que l'anunciada baxada de la lleche pon en riesgu a les ganaderíes

L'Asociación Agraria de Nuevos Llabradores (Asaja) d'Asturies considera que les baxaes de preciu de la lleche treslladaes de forma unillateral pola industria láctea a los ganaderos, y que se camienta sigan nos mese vinientes, resulten «inaceptables» dafechu, teniendo en cuenta l'importante descensu de producción y de ganaderos, constatáu polos datos publicaos pol Ministeriu d'Agricultura, Pesca y Alimentación.

«Que nun país deficitariu como España, se produza un descensu del preciu énte una situación d'escasez de productu, acota que l'únicu interés de la industria láctea española ta en consiguir una bona cuenta de resultancies», asegura'l presidente d’Asaja n'Asturies, Ramón Artime, qu'esplica que l'asociación agraria tien constancia de les importaciones de lleche y productos lácteos d'otros países per parte de les industries láctees, «lo que-yos permite llograr importantes beneficios a cuenta d’abandonar al sector productor español».

Por ello, dende Asaja esixen al Ministeriu d'Agricultura que se faiga un siguimientu y control refechu pa que nun s’etiqueten como productu español lleche o productos lácteos procedentes d'otros países «embaxo nenguna circunstancia».

«Les repitíes baxaes del preciu de la lleche per parte de les industries, nun escenariu d'elevaos costos de producción y de seca, suponen una importante perda de rentabilidá pa los ganaderos y que va traer de resultes más pieslles d'esplotaciones», alvierte Artime, qu'aportuna en que «la industria láctea ta xugando col futuru de la ganadería de lleche n'España, con un oxetivu curtioplacista que-yos xenere una bona cuenta de resultancies a 31 d'avientu, importándo-yos poco'l sector productor». «Que nun se-yos escaeza qu'ensin ganaderos la industria láctea española nun tien futuru», señala.