Ecoloxistes piden esplicaciones al Principáu énte la elevada contaminación en Somiedu

La Coordinadora Ecoloxista d'Asturies pidió esplicaciones al Principáu d'Asturies poles midíes que ta tomando p'amenorgar la elevada contaminación que se ta dando d'ozonu troposféricu n'Asturies, d'alcuerdu a los datos de les estación de fondu allugada en Somiedu.

Asegura'l colectivu que d'alcuerdu a la web del Ministeriu pa la Transición Ecolóxica y el Retu Demográficu del Índiz Nacional calidable del Aire, la estación allugada en Va??e del ??agu en Somiedu, presenta una situación «regular». Añaden que los estudios epidemiolóxicos recién de series cronolóxiques demostraron que se producen efectos na salú con concentraciones d'ozonu per debaxo del valor guía anterior.

Esplica la Coordinadora que l'ozonu troposféricu medra en mayores cantidaes, per medios artificiales, convertío nun contaminante tóxico. A diferencia d'otros contaminantes que son emitíos directamente poles sos fontes, l'ozonu ye un contaminante tipu secundariu, esto ye, nun ye emitío directamente a l'atmósfera, sinón que se produz nella a partir d'hidrocarburos (compuestos orgánicos volátiles), metanu, monóxidu de carbonu y óxidos de nitróxenu que reaccionen cola radiación solar.

Alvierten qu'en concentraciones alzaes l'ozonu pue provocar daños na salú humana, la vexetación y los ecosistemes, siendo amás un factor importante a considerar no que cinca al cambéu climáticu.