El pabellón del Principáu na Fidma recibió casi 70.000 visites
Agora
Más de 1.300 persones cubrieron el formulariu pa optar a dalgún de los regalos patrocinaos pola sociedá Xestión d'Infraestructures Públiques de Telecomunicación del Principáu (Gitpa)
21 Aug 2023. Actualizado a las 18:19 h.
Casi 70.000 persones pasaron pel pabellón del Principáu nos 15 díes que duró la Feria Internacional de Muestres d'Asturies (Fidma), de les que 61.000 yeren residentes n'Asturies, 1.500 estranxeros y 7.300 d'otres comunidaes autónomes, sobre manera de Castiella y Llión, Madrid y Galicia.
Según el Gobiernu rexonal, la esposición sobre innovación industrial y desenvolvimientu científicu y tecnolóxicu qu'acoyía'l pabellón, na que collaboraron una ventena d'empreses ya instituciones, más que doblóse'l númberu de visites que tuvo na anterior edición de la Fidma.
Más de 1.300 persones cubrieron el formulariu pa optar a dalgún de los regalos patrocinaos pola sociedá Xestión d'Infraestructures Públiques de Telecomunicación del Principáu (Gitpa): auriculares, patinetes y gafes de realidá virtual, que se sortiaron el domingu.
La presencia del Principáu en Fidma valió tamién pa presentar l'Axencia de Ciencia, Competitividá Empresarial ya Innovación (Sekuens) del Gobiernu d'Asturies, encargada de xestionar les acciones de la I+D+i rexonal.
El conseyeru de Ciencia, Empreses, Formación y Empléu, Borja Sánchez, treslladó'l so agradecimientu a les empreses ya instituciones participantes, amás d'al comisariu de l'amuesa, David González, y al personal de Sociedá Pública de Xestión y Promoción Turística y Cultural del Principáu, encargao de la xestión del pabellón.