Cultura va tener una Subdirección Xeneral de Política Llingüística que va depender directamente de la viceconseyera

La Viceconseyería de Cultura, Política Llingüística y Deportes va cuntar con una Subdirección de Xeneral de Política Llingüística, que va depender directamente de la viceconseyera Vanessa Gutiérrez, qu'al empar depende directamente de la Presidencia del Principáu.

La estructura alministrativa del Gobiernu d'Asturies incorpora pela primer vez subdirecciones xenerales, previstes na Llei del Principáu d'Asturies 2/2023, de 15 de marzu, d'Empléu Públicu. Esta figura yá existe n'otres alministraciones autonómiques y tamién na estatal. Ente estes subdirecciones xenerales va tar la de Política Llingüística, encargada promover, desenvolver, executar y evaluar les polítiques públiques a entamar nel ámbitu de la llingua asturiana y el gallego-asturianu.

Asina, según se recueye nel BOPA d'esti xueves 16 d'agostu, esti departamentu va analizar y proponer midíes pal desenvolvimientu de la llexislación relativa a la normalización del usu del asturianu y del gallego-asturianu nel so ámbitu, amás de los criterios llingüísticos xenerales en materia de contratación, publicaciones, actividaes suxetes a autorización o concesión alministrativa, subvenciones y ayudes. Tamién va realizar el siguimientu y análisis del cumplimientu y efectividá de les midíes adoptaes para la normalización del usu del asturianu y del gallego-asturianu nel so ámbitu, amás de proponer a la Viceconseyería actuaciones pa la ellaboración y el desenvolvimientu del plan y/o estratexes de normalización llingüística del asturianu na Alministración del Principáu, y proponer les midíes afayadices pa la coordinación y el siguimientu d'estes en collaboración coles persones responsables de cada departamentu y entidá de l'Alministración de la Comunidá Autónoma.

La Subdirección va executar los planes, proyectos y oxetivos establecíos pola persona titular de la Viceconseyería, y va impulsar les decisiones adoptaes nesti ámbitu, proponiendo actividaes nueves de meyora o innovación, nel ámbitu de la política llinguística. La Viceconseyería de Cultura, Política Llingüística y Deporte, dirixida por Vanessa Gutiérrez, va cuntar tamién con una Dirección Xeneral d'Acción Cultural y Normalización Llingüística, que va tener dos servicios: Acción Cultural y Normalización Llingüística.

La Dirección Xeneral d'Acción Cultura y Normalización Llingüística va tener les funciones de promover, protexer y fomentar la política cultural asturiana y la so diversidá llingüística, amás de l'actividá de creadores y artistes nes materies de la so competencia, amás de la planificación y execución de programes de promoción y conocimientu de la llingua asturiana y la puesta en marcha d'actuaciones que contribuyan a la efectiva normalización del so usu, fomentando la so recuperación y desenvolvimientu.

Nesi sentíu, el Serviciu d'Acción Cultural va tener la función de desenvolver programes de fomentu y promoción de la creación artística en toles sos facetes y pa la diversidá llingüística d'Asturies, incluyendo les artes escéniques, la música, les artes visuales, la lliteratura, el cine, l'audiovisual y el videoxuegu.

P'acabar, al Serviciu de Normalización Llingüística va tar encargáu de la programación d'acciones de normalización llingüística y cultural que fomenten l'usu y promoción del asturianu, amás de la investigación sociollingüística y l'análisis y siguimientu de la vida cultural asturiana y de la industria que se desenvuelve nes sos llingües propies.

Asina, va encargase de la convocatoria y xestión de les llinies de subvenciones y ayudes pa la dinamización y promoción de la llingua asturiana en tolos ámbitos, de la promoción y usu del asturianu y del gallego-asturianu nos medios de comunicación, con especial atención los de titularidá pública y el fomentu del usu del asturianu en manifestaciones culturales y artístiques, especialmente na industria del llibru, les artes escéniques, la música, les artes visuales, la lliteratura, el cine, l'audiovisual y el videoxuegu n'asturianu y en gallego-asturianu, informa Europa Press.

Otra manera, va encargase de la participación en feries, congresos y esposiciones que permitan promocionar les llingües propies nel ámbitu nacional y internacional y el desenvolvimientu d'actuaciones qu'ameyoren la conocencia oral y escrita del asturianu na población, creando campañes y materiales específicos para tal fin.