La Quinta de Selgas va ser Bien d'Interés Cultural

La Conseyería de Cultura, Política Llingüística y Turismu empezó'l trámite pa declarar bien d'interés cultural (BIC) la Quinta de Selgas, allugada n'El Pitu (Cuideiru). El Boletín Oficial del Principáu (Bopa) publica güei la incoación del espediente pa otorgar protección integral a les edificaciones, xardinos y colecciones artístiques que conformen el complexu por cuenta del so relevante valor históricu.

La Quinta de Selgas ye ún de los conxuntos arquitectónicos, histórico-artísticos y paisaxísticos más importantes de la comunidá. Ta integráu por edificaciones, xardinos y colecciones artístiques del máximu interés, promovíes y axuntaes polos hermanos Fortunato y Ezequiel de Selgas Albuerne, mecenes y promotores d'importantes obres sociales na segunda metá del sieglu XIX.

El procedimientu alministrativu pa declarar BIC esti complexu enllargaráse un máximu de dos años y va tener qu'axuntar los preceptivos informes de l'Academia de la Historia, la Universidá d'Uviéu y el Real Institutu d'Estudios Asturianos (Ridea). En casu de que los dictámenes seyan favorables, el Conseyu de Patrimoniu va ser l'órganu encargáu d'aprobar definitivamente la declaración.

El gustu eclécticu de los mecenes

El conxuntu patrimonial de los Selgas-Fagalde n'El Pitu inclúi, amás de la finca principal de La Quinta, na que s'integren el palacete, los xardinos y el pabellón de tapices; una ilesia-panteón cola so sacristía, la casa rectoral y les escueles, amás de colecciones artístiques y elementos documentales y bibliográficos. Les edificaciones constitúin ún de los conxuntos arquitectónicos más destacaos d'Asturies dientro d'un estilu eclécticu historicista, anque con pautes bastante fieles al neoclasicismu.

La casona, que los sos trabayos de construcción y decoración dirixó'l mesmu Fortunato Selgas ente les décades de los años 80 y 90 del sieglu XIX, conserva en bona midida la so decoración orixinal y alluga obres artístiques de notables pintores, asina como una estensa colección de moblame y elementos decorativos (porzolanes, relós, abanicos, etcétera) y una nutrida biblioteca.

El palacete, con anterioridá vivienda de la familia Selgas, tien cuatro altores: semisuétanu, dos pisos nobles y otru de menor altor so la cubierta. El semistuéanu yera la zona de serviciu y allugaba la cocina, les despensas, l'obrador y planchador. Nel primer pisu noble tán los cuartos con función representativa, p'acoyer los momentos festivos y más importantes de la vida familiar. L'antepar da pasu a los distintos salones comunicaos ente sí: el comedor, la sala de xuegu, el salón de baille y la sala Lluis XV, dende la que s'apuerta a la biblioteca. El segundu pisu noble ye la zona privada, onde se distribúin les alcobes principales coles sos dependencies anexes, tocadores y vistidores, con vistes a los xardinos. La tercer planta ta habilitada con cuartos cenciellos pa la vida cotidiana de los descendientes de la familia. Los xardinos de La Quinta respuenden a una tipoloxía bien escasa n'España: xardín priváu, complementu d'una residencia de campu nuna zona rural y el so paradigma foi'l modelu versallescu.

La práctica coleccionista de los hermanos Selgas, con un gustu eclécticu, configuró un ricu y diversu conxuntu de pintures, escultures y artes decoratives de gran calidá. La colección fórmase a partir de 1885, cuando les obres del palacete yá taben bien avanzaes. La mayor parte de les artes decoratives -muebles, relós, porzolanes- vienen de Francia. Tocantes a les pintures, predominen les adquisiciones nacionales, les series sobre obres sueltes y l'ausencia de pintura coetanea. Sobresal especialmente'l cuadru L'Anunciación, d'El Greco. Nesti sentíu, Cultura punxo en marcha'l pasáu xineru'l trámite del espediente pa declarar BIC esta obra, un oleu sobre llenzu de 109 x 57 centímetros d'altor, bien similar al de la capiya Oballe, de Toledo.