González-Riaño: «Soi sabedor de que nel PP hai xente que ye consciente de que'l partíu tien que sumase al consensu de la oficialidá»

El presidente de la Academia de la Llingua Asturias, Xosé Antón González Riaño analiza la situación sobro l'alderique del asturianu en víspores de les elecciones autonómiques.

-Faltó bien poco la llexislatura pasada p'algamar los apoyos necesarios pa la reforma de la oficialidá, ¿pésa-y más la decepción o la esperanza pal futuru?

-Bono, la verdá ye que la decepción foi bien fonda y ente munchos de nós xeneróse una enorme frustación, sobre too porque consideramos que nun se fexo una negociación acordies cola importancia histórica del momentu. En dalgunos casos pesó más el tacticismu que la xenerosidá necesaria p’algamar alcuerdos. Tamién hubo dalguna llamentable inesperiencia per parte de los actores nel procesu de negociación. En fin… de toes formes enxamás ye la «última oportunidá». Yo, y muncha más xente, consideramos qu’hai que siguir calteniendo l’enfotu en llograr la oficialidá nesta llexislatura y aumentando les llendes del consensu políticu. Como dixe nel Día de les Lletres Asturianes, en términos sociales y políticos ye inalmisible una escepcionalidá constitucional que dura más de cuarenta años…

-¿Foi, como dicen munchos, el fracasu de la llexislatura pasada un trunfu de la estrema derecha?

-En realidá la negación dafechu de los derechos llingüísticos n’Asturies y la manifestación espresa de que la Constitución Española nun tien que facese efeutiva n’Asturies na cuestión cultural y llingüística ye una posición política típica de sectores minoritarios y d’estrema derecha. Yo, la verdá, nun veo al centru-derecha nesa posición…

-Nel PP Álvaro Queipo usa l'eonaviegu na Xunta Xeneral y tamién nos sos mensaxes en redes sociales, ¿cree que'l PP va camudar la so posición nel futuru?

-Ye necesario y fundamental. El PP ye, xunto col PSOE, el gran partíu a nivel estatal y autonómicu. En toles comunidaes con llingua propia esti partíu participó nel consensu pa facer efeutiva la previsión constitucional d’oficialidá. Yo soi sabedor de que nel PP d’Asturies hai xente que ye consciente de que’l partíu tien que sumase a esi consensu n’Asturies. Dende un puntu de vista práuticu, ye lo meyor pa, nel so casu, facer una política llingüística d’oficialidá axustada a la realidá sociolóxica asturiana. Yo, dende llueu, voi facer el máximu esfuerzu como Presidente de l’Academia pa que’l PP d’Asturies forme parte de la solución constitucional y collabore nel procesu de dignificación de la llingua d’Asturies. Incluyendo, lóxicamente, al eonavigu

-Hai un sofitu creciente ente la población al asturianu pero tamién se polarizó l'alderique y los que son contrarios estremaron esa opinión ¿cómo trataría de convencelos?

-Ye verdá que la estrema derecha tien como estratexa fomentar la crispación con esta cuestión, pero tolos estudios sociollingüísticos dícennos que la xente del común refuga esa crispación. Les posiciones d’odiu hacia la llingua y la cultura d’Asturies, hacia Asturies, son minoritaries. Dende posiciones democrátiques y constitucionalistes nun se pue cayer nel error d’envizcase con esos plantegamientos. Dende la serenidá y el sosiegu hai qu’aporfiar nel cumplimientu de la Constitución y en treslladar a la opinión pública los llogros culturales que xenera la oficialidá. El casu de Galicia ye bien elocuente…Nós nun tenemos qu’inventar nada, trátase namás de cumplir la norma llegal y siguir l’exemplu gallegu, que ye lo que tenemos más averao…

-El PERTE de les llingües, col impulsu al desenvolvimientu de la Intelixencia Artificial dexa fuera al asturianu por nun ser llingua oficial, ¿cuántes coses pierde la comunidá por esta circunstancia?

-Asturies pierde muncho económicamente por nun tener la llingua oficializada, pero muncho, muncho… De fondos estatales y europeos son unes cuantes decenes de millones añales… Nun podemos escaecer, amás, qu’una llingua oficializada xenera desarrollu económicu. En Galicia, por siguir col exemplu, la producción cultural vehiculada en gallegu xenera cuasi un 3% del PIB de la comunidá, más que la industria química… Ye dicir, tien una incidencia económica enorme. En cuantes a la Intelixencia Artificial, ye cierto qu’Asturies pierde oportunidaes por nun tener oficializaes a les llingües… De toes maneres, equí nun tamos tampoco paraos con esi tema: hai una alcuerdu ente l’alministración del Principáu (nel que collabora l’Academia) y la Universitat Ouberta de Catalunya pa trabayar na fechura d’un traductor automáticu neuronal pal asturianu. L’académica y profesora de la Universidá d’Uviéu, Cristina Valdés, coordina les aiciones dende Asturies y el próximu añu va haber novedaes bien interesantes pa la llingua asturiana en rellación cola Intelixencia Artificial. Bono, de fechu, ChatGPT cada vegada remana meyor l’asturianu… Esi ye un ámbitu nel que tenemos que tar dende l’aniciu…