Nueva oportunidá

Enxamás aportó tan lloñe la vindicación pola oficialidá. Ta a palma gatu.

Na llexislatura que ta acabante finar hebo 26 diputaos favoratibles na Xunta Xeneral, mientres que la mayoría cualificada desixida pa la reforma l’Estatutu son 27 diputaos, o seya 3/5 del Parllamentu Asturianu. Lo qu’incluyiría la oficialidá.

Les eleiciones asturianes del 28 mayu son una nueva oportunidá. Asina, la mayoría política aportará yá, o col pasu del tiempu, pola conocencia que medra sobre l’idioma, espeyando la mayoría cultural y social qu’amuesa’l sofitu de más de la metada d’asturianos y asturianes a la igualdá coles otres llingües cooficiales.

Poro, fai falta axuntar los esfuercios de tolos grupos y persones favoratibles, cola coordinación na estaya política pol bien común, pal algame de lo que ye de xusticia hestórica.

Como afita l’ALLA, namái una parte los funcionarios habríen conocelu. Los d’ámbitos de cara al públicu y l’enseñu, como una asignatura más del currículu educativu, principalmente. Pue ser un méritu, non un requisitu, en xeneral.

Como pue ser vehicular parcialmente na educación non universitaria, según el modelu de política llingüística del gobiernu asturianu del momentu.

Ye esparder la necesidá d’inversión en materia llingüística pal enraigonamientu la población y el desendolque de la mesma. Namái supón 20 millones d’euros, menos d’un 0,5 % del presupuestu añal de la comunidá autónoma. Amás del accesu a les ayudes del Estáu a les llingües cooficiales. Que revertiría na ciudadanía na so mayor parte.

Caltener l’heriedu xeneracional y protexelu. Tamién xeneraría riqueza, como asocede coles otres comunidaes con llingua propia oficial.

Ye inevitable porque ta nel testu de la vixente Constitución nel artículu 3.2. Y nun va ser un modelu traumáticu. Amás torgaría la perda de población y aumentaría la producción nel PIB, lo que ye necesario nuna comunidá n’escayencia económica y poblacional. Quiciabes el nun tener entá la reconocencia llegal del idioma propiu tenga daqué que ver cola situación.

Ser nós mesmos, caltener la identidá d’esti pueblu, nun va escontra nadie. Namái ye la reconocencia del valir qu’apurre l’asturianu a la singularidá del país y a la riqueza del conxuntu de los Pueblos d’Europa.

Esti añu ye’l del III Premiu Nacional de Lliteratura Asturiana concedíu pola ALLA, y algamáu pola poeta Lourdes Álvarez. Cellebraráse nel Teatru Campoamor d’Uviéu na tarde del 5 mayu, Día de les Lletres Asturianes, como yera davezu enantes de les torgues pola pandemia. Y el día dempués, el 6 pela mañana, fadráse la manifestación entamada pola XDLA.

Anque persabemos, dempués de mediu sieglu esperando cívicamente, cuálu ye’l meyor premiu posible pa la llingua asturiana.

El de la oficialidá.