Separtaos y xuntos

Fai al rodiu d'un millón d'años que vivimos como especie na Península ibérica. Al entamu, la sociedá prehestórica yera igualitaria y considerábase al mesmu nivel que'l restu d'animales. Llueu vieno la dominación del home sobre los animales cola domesticación dende'l Neolíticu. La fin de la prehestoria dátase cola escritura.

Na cabera glaciación del Pleistocenu (11.000 ? 10.000 años), grandes zones del planeta esfrecieron de sópitu y anubrieron de mases de xelu, camudando de mou radical los ecosistemes, afeutando a la vida de les estrremaes especies animales.

Dellos puen vese inda nel Parque de la Prehestoria de Teberga, como los uros, bisontes europeos, caballos Przewlaski, venaos y paletones. 

Diez mamíferos estintos qu'habitaron Asturies nel Pleistocenu foron el mamú llanudu, el rinoceronte llanudu, el bisonte d'estepa, el llobu, la hiena de les cueves, el lleón de les cueves, l'osu de les cueves, el venáu xigante, el renu y el llobu cerval européu.

Cuando los primeros habitantes de la Península Ibérica vinieron d'África foi l'entamu de la prehestoria. Equí s'atopen restos del home de neandertal y del home modernu.

Al traviés de la memoria y la capacidá de falar, l'home estremóse del restu d'animales cola tresmisión cultural de les sos conocencies.

Y anque a lo primero considerábenlos como iguales, dempués prodúxose la formación d'animales dondos al serviciu del home. Y poro, surdió'l so sentimientu de superioridá respeutive a ellos.

Dempués vieno l'agricultura y la ganadería. Les relixones monoteistes y la creyencia de ser la especie escoyida pa dominar el mundiu.

Namái nos caberos años d'esti sieglu XXI, los movimientos animalistes llograron que la llexislación nun considerara a los animales como coses sinón como seres vivientes.

Anguaño n'Asturies hai más perros que reciella nes families, y la perda d'ún d'ellos vese con gran dolor mesmo que si fuere un miembru más de la familia.

La humanización de les mascotes nes ciudaes ye un fenómenu que ruempe col emplegu de los animales nel mundiu rural.

El maltratu hestóricu que se diera a los animales entama a vese como un retu a superar. Nesti momentu, por exemplu. yá nun hai corríes de toros nel país. Como nes Islles Canaries y Cataluña. Anque sigue la llucha porque tolos perros seyan iguales pa la mesma llei.

Nesa llinia, la sociedá avanza haza cánones más propios del norte d'Europa nel respetu a los animales. El cambéu aportó y cada vegada con más velocidá. Déxense atrás costumes negatives perconocíes na nuesa rellación colos animales, colos que compartimos el territoriu y vuélvese a una cierta harmonía, no posible, d'empatía real con tolos seres vivos.

Tornar a xuntanos dempués de separtanos. Esi ye'l camín que tenemos delantre.