L'Academia de la Llingua agospia un alcuentru wikipedista

L'Academia de la Llingua Asturiana (ALLA) va agospiar nel so llar social, con motivu de la celebración del Día Européu de les Llingües, una xornada d’edición de la comunidá de persones usuaries de Wikipedia n’asturianu el próximu 26 de setiembre dende les cuatro y media la tarde.

Col oxetivu d’ameyorar la calidá y la correición llingüística del conocíu proyeutu d’enciclopedia llibre, delles persones con amplia esperiencia n’edición en Wikipedia van ameyorar y referenciar llingüísticamente artículos inxeríos na categoría de 1.000 artículos indispensables.

Coincidiendo col Día Européu de les Llingües, esta actividá vien a dar visibilidá al asturianu, llingua que destaca ente’l conxuntu de proyeutos wikipedistes a nivel mundial y européu, ente otres cuestiones, por acabar cola fienda de xéneru nes biografíes d’homes y muyeres, siendo una de les primeres n’algamar la paridá.

D’otra manera, con más de 130.000 artículos, l’asturianu allúgase nel puestu 28 ente les llingües de los estaos miembros y nel 64 de les más de 300 con representación na enciclopedia plurillingüe. Esta xornada, que va durar alredor de tres hores, da continuidá al alcuentru celebráu’l pasáu 4 de payares de 2021, y que, naquella ocasión, taba dirixíu a deprender el funcionamientu de Wikipedia a usuarios nuevos, creando y ameyorando dellos artículos.

Asina, nesta xornada zarrada a persones con esperiencia previa, la comunidá d’usuarios busca afitar los nexos cola Academia de la Llingua Asturiana como entidá cimera na regulación y normativización del asturianu.