Les empreses tecnolóxiques yá representen el 4% del PIB d'Asturies

La conseyera de Facienda, Ana Cárcaba, destacó güei'l sofitu del Principáu al sector tecnolóxicu, un ámbitu económicu «clave pal futuru de la comunidá», que yá supón el 4% del PIB rexonal. Como exemplu d'esi sofitu, citó la participación d'Asturies nel Programa Europa Dixital, que favoreció la meyora de la dixitalización de les empreses asturianes nel periodu 2015-2021.

Nesti sentíu, recordó que'l Principáu destinó 30,8 millones a esta iniciativa, una cantidá que permitió movilizar inversiones por un valor global de 80 millones. Tamién valoró la importancia del Plan de Recuperación, Tresformamientu y Resiliencia pal sector tecnolóxicu. Anguaño, Asturies tien asignaos 56,7 millones procedentes del Mecanismu de Recuperación y Resiliencia.

D'esa cantidá, más d'un 40% dedícase a inversiones que van fomentar la transición dixital per aciu d'actuaciones en diversos ámbitos, como'l tresformamientu dixital de l'Alministración, la meyora de les competencies venceyaes coles TIC, la modernización del comerciu o'l fomentu de la conectividá.

Cárcaba axuntóse esta mañana cola directiva del Clúster TIC pa conocer el trabayu que desenvuelve esti colectivu, piedra angular del sector tecnolóxicu. Mientres l'alcuentru, encetóse otra de les llinies de sofitu más importantes pa les empreses del ramu, el denomáu kit dixital, empobináu a la dixitalización de pymes y autónomos. Les compañíes incluyíes nel clúster desempeñen una función clave na xestión d'estes ayudes, yá qu'actúen como intermediaries.