El PP d'Uviéu quíta-y una cai a Concepción Arenal

Concepción Arenal enxamás supondría qu’un políticu, nesti casu’l señor Canteli, alcalde d’Uviéu, col sofitu de Ciudadanos y de la extrema derecha, nel sieglu XX, dos sieglos depués del so nacimientu, ficiere una «purga selectiva» tanto con ella como con otres muyeres pa que los sos nomes nun tuvieren nes cais de la ciudá. El casu ye que si conociere’l so pensamientu machista, retrógradu y homófobu nun se sorprendería. De toles maneres, ye inesplicable y más cuando falamos de muyeres como Arenal, que podría ser una bona representante del so ideariu: conservadora, católica y mui lloñe de tou tipu d’estremos, que prefería la reforma a la revolución. Con esta actuación intolerante demuéstrase’l noxu hacia la igualdá qu’inda hai en dellos ayuntamientos conservadores na actualidá.

Entá queden munches zones escures de Concepción Arenal porque a ella nun-y gustaba falar de la so vida privada, convencida de que sedría la manera de ser respetada como intelectual. De toles formes, la so personalidá y pensamientu queden claros nos sos escritos -siete noveles, cuatro cuentos, les sos fábules en versu fueron declaraes llectura obligatoria na enseñanza primaria, diecisiete ensayos y cientos d’artículos- que nos ayuden a conocela meyor. Ello ye que foi una muyer poliédrica, adelantada al so tiempu: escritora, periodista, pensadora d'ampliu espectru, pacifista, ecoloxista (defendíó con pasión el caltenimientu de la naturaleza), antitaurina… D’ella destácase que foi una de les actives pioneres de los movimientos feministes pola igualdá de xéneru, anque’l so feminismu ye consideráu «xenuinamente español e íntegramente católico». Camentaba que la Ilesia tenía qu’adaptase a los nuevos tiempos y dexar de refugar el pensamientu que nun-y fuere afín. Al vivir ente dos corrientes antagóniques, los católicos conservadores nun la consideraben una d’ellos y muncho menos los anticlericalistes. Criticó los fanatismos, como la «ceguera de la intelixencia» que desprestixen la relixón y empequeñecen la idea de Dios. Asina mesmo, critica a les muyeres que pasen tol día na ilesia, les falses beates: «Ye más grande énte Dios la que fortalez un alma debilitada pol fríu de la dulda, la que consuela al desgraciáu y la que protexe la indixencia, que la que pasa'l día arrodiyada na ilesia» y allaba a les muyeres que s’esforzaron en cambios xurídicos y educativos. Pide que les muyeres puean acceder a tolos estudios universitarios, que s'igualen los salarios pa los mesmos trabayos y destaca les fuertes contradicciones nes que caen filósofos y antropólogos al xulgar a la muyer. Concha incurrió en delles contradiciones, nun taba a favor de la intervención de la muyer en política, anque la so vida yera un exemplu de lo contrario.

Anque lluchó en múltiples campos, como’l de la reforma de les prisiones o’l de la educación de la muyer, malpenes tuvo siguidores. Lo que naide pue negar ye que ruempe techos de cristal: en 1863 convirtióse na primera muyer que recibió’l cargu de visitadora de cárceles de muyeres qu’hasta esi momentu tuviere ocupáu n’esclusiva por homes. Foi pionera n'España de los derechos humanos y anovó aspeutos como’l trabayu social, tando la reforma penal mui presente na so obra.

La vida de Concepción Arenal nun foi un camín de roses. Con nueve años tuvo que ver cómo so pá morría por defender les sos idees lliberales. El militar Ángel del Arenal, miembru d'una ilustre familia de Santander, combatió coles armes escontra l’absolutismu de Fernando VII. El rei vengóse colos militares que se llevantaron y munchos d’ellos morrieron enfermos y solos. El fracasu del pá marcóla mui fondamente. Nunca s’escaeció de lo que sufriere na cárcel y el sofitu y la consideranza qu’amosó hacia los débiles y marxinaos vien d’ehí, de ver a so pá sufriendo en soledá, y por esti motivu defendió una necesaria reforma penitenciaria. L’alegría nun foi dalgo que la describiere; ye más, definíase como un vasu negru capaz de tiñir l'agua d’esi color. Y ye que la desgracia persiguióla tola vida: perdió a dos de los sos fíos y al so home, anque lo que la va marcar fondamente foi la muerte del padre. Ensin embargu, nun tuvo bona rellación con so ma, Concha Pose Tenreiro, que nun la entendía. Católica y mui estricta, tuvo qu’educar sola a les tres fíes. Cuando tenía 20 años so güela déxa-y n’herencia tolos bienes de la familia. Al otru añu muerre so ma quedando güérfana mui moza, pero con bon capital pa encalzar la so vida. A pesar de la so mocedá, la so educación ye bona y domina munchos idiomes, alterna en tertulies y teatros, ye una llectora empedernida y viaxa, amosando asina’l so gran sentíu d’independencia. Como Concha Arenal nun siguía les normes establecíes, en 1842, a la muerte de so ma, decidió dir a clases universitaries.Ye bien sabío l’anécdota según la cual Concepción Arenal diba vistía d’home p’asistir a les aules de la Universidá Central pa poder estudiar Derechu. Ye complicao saber si’l so tipu de ropa más masculina foi la causa de la lleenda, porque la universidá entá nun contemplaba l’acesu a les muyeres, y piensase tamién que pudo ser dacuando una «oyente clandestina». El casu ye que cuando Concha yera una figura reconocida, más nel estranxeru que n’España, volvió al Paraninfu pa impartir delles conferencies. Na universidá conoció al que diba ser el so home, l’abogáu ya escritor Fernando García Carrasco, 15 años mayor que ella, col que se casó en 1848 y col que vivió un matrimoniu igualitariu. Acompañábalu a les tertulies polítiques y lliteraries de Madrid y col tiempu compartió la dirección nos tres periódicos que fundare.

Esperemos qu’a lo cabero muyeres como Concha Arenal, que fueron silenciaes nel pasáu y que dos siglos después n’Uviéu un alcalde del PP xunto a Ciudadanos y Vox vuelven a silenciar, quitándoles del caleyeru, tengan nel futuru la oportunidá de tar presentes con otra corporación más inclusiva y feminista que piense, lo mesmo que pensaba ella, que «el llugar de la muyer na sociedá marca’l so nivel de civilización».