La FSA recuerda que la oficialidá tovía suma 26 votos porque Foru «sigue dialogando internamente»

La secretaria d'organización de la FSA, Gimena Llamedo, indicó esti vienres que, pel momentu, los diputaos favorables a la oficialidá sumen 26 votos, porque hai otru partíu, en referencia a Foru, «que sigue dialogando internamente». Asina lo indicó la númberu dos de los socialistes asturianos nuna rueda de prensa xunto la vicesecretaria d'organización del PSOE, Adriana Lastra, y depués de qu'esta mañana se celebrara una xunta ente PSOE, Podemos Asturies, IX y Foru Asturies pa negociar la reforma del Estatutu y incluyir la oficialidá del asturianu y del gallego-asturianu.

Un alcuentru onde, según Llamedo, constatóse «que siguimos siendo 26 diputaos a favor de la oficialidá --PSOE, Podemos y IX-- y que sigue habiendo otru partíu políticu que nun muestra una posición a favor, que sigue dialogando internamente --Foru--». El votu favorable de Foru Asturies a la reforma --indispensable pa sumar los 27 votos necesarios pa sacala alantre-- ta condicionáu a que la Llei que desenvuelva la oficialidá s'apruebe por trés quintos de la Xunta Xeneral, dalgo qu'aceptaron el restu de formaciones, pero amás Foru reclama desaniciar 'de facto' l'impuestu de sucesiones, bonificándolo hasta'l límite d'un millón d'euros. Un puntu qu'IX refugó.

Con too, Llamedo destacó esti vienres la voluntá de llegar a un alcuerdu y «desbloquiar la situación» porque «si nun se desbloquia la negociación col tema de la fiscalidá, difícilmente vamos poder avanzar nel restu de cuestiones». Pa siguir avanzando, la FSA apurrió al restu de grupos una propuesta de redacción del artículu cuatro del Estatutu «sobre la que vamos siguir falando». L'alcuentru próximu ente les fuercies favorables a reformar l'Estatutu va ser la selmana que vien, informa Europa Press.