Barbón pide a Vox rectificar el so «acosu» a Pumares y Blanco diz que «taría encantáu» de que-y fixeren «publicidá en cartelos»

El presidente del Principáu d'Asturies, Adrián Barbón, pidió esti miércoles al portavoz de Vox, Ignacio Blanco, rectificar la campaña de «acosu» al diputáu de Foru Adrián Pumares, a lo que'l parllamentariu de Vox insistió en «sacar a la vía pública» la so «incongruencia» sobre la oficialidá del asturianu.

D'esta manera referíase'l presidente a les valles de Vox na vía pública cola cara del diputáu y secretariu xeneral de Foru nes que se-y acusa de «vendíu» énte la posibilidá de que'l so votu sía determinante p'aprobar una reforma del Estatutu d'Autonomía qu'incluya la oficialidá del asturianu y del gallego-asturianu.

«Pola decencia d'esta Cámara», pidió Barbón a Blanco, «dende l'autoridá moral» que considera que-y da condenar públicamente los «ataques» a dirixentes de Vox, que «rectifique esa actitú d'acosu y de señalamientu al diputáu Adrián Pumares».

Nesi sentíu, el portavoz de Vox manifestó que tolos diputaos decidieron ser «políticos profesianales por voluntá propia». «Paez ser qu'hai persones que s'avergoñen de la posición que tán tomando sobre determinaos asuntos, y por eso se xenera esti espolín», añadió, pa señalar que como políticos profesionales tán espuestos «a la crítica pública, interna y esterna».

Asina, Blanco dixo que «taría encantáu» de que-y fixeren «publicidá en cartelos» colo que diz na Xunta Xeneral. «Tenemos claro que la incongruencia de dellos políticos tien que sacase a la vía pública», dixo na so intervención nel turnu d'entrugues al presidente nel que se dirixió a Barbón pa saber «qué competencies nueves, de les que trata nes sos xuntes secretes de llombu de los asturianos, quier usté qu'estatutariamente s'otorguen a Asturies».

El portavoz de Vox, qu'almitió qu'igual nun son xuntes «secretes sinón discretes», faciendo referencia al términu utilizáu pol presidente, refirióse amás a problemes «d'organización y recursos» p'asumir les competencies yá tresferíes al Principáu primero de tratar de tener árees competenciales nueves.

Per otru llau, Adrián Barbón repitió que l'actitú de Vox con Pumares supón una «infamia» que va pasar a la historia del parllamentarismu de la Xunta Xeneral.

D'esta manera, criticó a Ignacio Blanco que tuviera «la oportunidá de retratase» pero optara por dicir que los diputaos puen tar «seles» porque nun van «buciar» nes sos vides privaes sinón que les sos campañes van centrase na so faceta pública como políticos.

«Dase cuenta de lo peligroso que ye pal sistema democráticu señalar a persones», insistió'l presidente asturianu al diputáu de Vox, encamentándo-y a cavilgar y reconocer «la infamia que supón señalar a otros diputaos»; informó Europa Press.