Derechos Sociales, Sepepa y Tragsa roblen un conveniu pa fomentar la empleabilidá de perceptores del salariu social

La Conseyería de Derechos Sociales y Bienestar, xuntu al Serviciu Públicu d'Empléu del Principáu d'Asturies (Sepepa) y el Grupu Tragsa, suscribieron esti llunes un conveniu de collaboración pa fomentar la inclusión llaboral de les persones que perciben el salariu social básicu na rexón.

Per aciu d'esti conveniu, el Sepepa y les empreses de Tragsa van valorar como méritu especial la condición de los beneficiarios d'esta renta mínima nos procesos selectivos que se pongan en marcha pa cubrir «contrataciones de personal necesaries pa dar rempuesta a actuaciones d'emerxencia y nes ufiertes d'empléu temporales derivaes d'encargos de cualquier órganu o entidá de l'Alministración del Principáu».

Na firma participaron la conseyera de Derechos Sociales, Melania Álvarez; el conseyeru d'Industria, Empléu y Promoción Económica, Enrique Fernández; y el presidente de Tragsa, Jesús Casas. La titular de Derechos Sociales destacó que con esti conveniu da rempuesta a los nuevos perfiles de beneficiarios que s'averen a los servicios sociales por culpa del andanciu.

Álvarez esplicó que, en casu de qu'un perceptor del salariu social refugue una ufierta de trabayu, fadríase-y un primer apercibimientu y, si reincide nel rechazu, habría un segundu y hasta tercer avisu. Nesi momentu, si la persona perceptora sigue refugando'l trabayu, va dase en suspensión la prestación.

Sicasí, señaló que l'Alministración nun espera qu'esta sía una actitú «numberosa». «Tenemos que poner en valor esi doble derechu», amestó, d'optar a una prestación económica en casu de situación de vulnerabilidá, y el sofitu a la inserción sociollaboral.

Pela so parte, el conseyeru Enrique Fernández esplicó que'l conveniu persigue promover y favorecer la incorporación llaboral de les persones beneficiaries del salariu social básicu. Trátase, dixo, de «una ferramienta adicional p'ayudar aquelles persones que se demostró que tienen mayores dificultaes d'inserción llaboral y, a última hora, una ferramienta que dexa lluchar escontra dos de los principales problemes de la sociedá, que son el desempléu y l'esclusión social».

El conseyeru convidó al restu d'empreses asturianes y a aquelles qu'operen nel territoriu a que «sigan el camín» entamáu por Tragsa pa favorecer la empleabilidá de los más vulnerables. Dende Tragsa, el so presidente agradeció al Principáu la propuesta del conveniu, y señaló que con esti alcuerdu sumaránse les necesidaes de la empresa, con una proyección positiva anguaño, coles necesidaes de les persones que quieren «un futuru meyor».

Vaticinó Casas qu'esti conveniu va tener «percorríu», y que nun va ser l'únicu. Anguaño Tragsa cuenta con 17.000 trabayadores en toa España, 600 n'Asturies, informa Europa Press.