Pa la llibertá sangro, llucho y pervivo

Cuando la presidenta de Madrid, la señora Ayuso, faló de socialismu (y comunismu) o llibertá, alcordéme de la figura de Miguel Hernández y d’unu de los sos poemes más emblemáticos:

Para la libertad sangro, lucho, pervivo.

Para la libertad, mis ojos y mis manos,

como un árbol carnal, generoso y cautivo…

La señora Ayuso paez que nun sabe, o que nun-y interesa saber, que Miguel Hernández, un home célebre de gran sensibilidá, yera la empatía personificada, sangró, lluchó y dio la so vida pola llibertá, pa que n’España nun añerara una dictadura que diba trayer censura, represión y, como non, la muerte de la llibertá. Llamentablemente nun lo llogró, el réxime franquista ganó y privaron-y de la llibertá que reivindicaba. Como tantos españoles, Miguel peregrinó poles cárceles de la posguerra: Sevilla, Madrid, Palencia, Alicante... A lo cabero la pena de muerte foi conmutada pola de reclusión a lo llargo de 30 años, yá que Franco fuera alvertíu de que matar a una de les principales voces de la lliteratura española, depués del asesinatu de Federico García Lorca, podía ser una publicidá mui negativa pal so réxime. De toles formes, yera sabío que les males condiciones de les infrahumanes y pioyoses cárceles causaben estragos. La bronquitis, el tifus y la tuberculosis desencadenaron en fimia pulmonar. El poeta adscritu a la Xeneración del 27 que destacó pola autenticidá de los sos versos, reflexu del so compromisu social y políticu, dio l’últimu suspiru un 28 de marzu de va 79 años.

Por dellos motivos, el so xuiciu, que podría incluyise nel teatru del absurdu, foi una auténtica comedia del disparate. El destín gastó-y una broma macabra a Miguel Hernández cuando foi xulgáu y condenáu a muerte namás por escribir poemes como’l Vientu del pueblu, editáu por un periódicu d’un nome cómicu: El Monu Azul. Enantes de ser funcionariu de xusticia y pasar al bandu nacional, el xuez Martínez Gargallo, encargáu de roblar la so sentencia de muerte nun procesu ensin garantíes xurídiques, dedicóse a escribir pieces humorístiques que provocaben les rises de los llectores en revistes como El Buen Humor. L’excómicu ensin escrúpulos metíu a xuez, falanxista próximu a les formes más pures del fascismu européu, nun provocaba la mesma risa nos inocentes intelectuales, escritores ya humoristes gráficos lleales a la República que víen como yeren condenaos por un ser despreciable que dicía qu’había qu’esterminalos ensin nengún tipu de miramientu. Amás, el xuez, que llevó una doble vida, dirixó a los grupos represores escontra los homosexuales, cuando él mesmu acudía con frecuencia a los llocales gais nos años de la República.

La señora Ayuso paez que nun sabe, o tampoco-y interesa saber, que Miguel Hernández redactó cuatro rellatos nun precariu cuadenín fechu con fueyes de papel hixénicu, al que llamó Nanas de la cebolla. Dedicóles al so fíu, Manolillo, al que nun conocía, porque la so muyer, Josefa Manresa, nun podía dir a velu na cárcel yá que’l so matrimoniu civil nun yera consideráu válidu nel Réxime. Josefa cuntó-y por carta que la falta de lleche obligábala a allimentar al so fíu con pan y cebolla. Otra maldita xugada del destín.

Miguel Hernandez, l’home de la «poesía pura», nun foi l’únicu al que-y arrebataron la llibertá y la vida. El periodista Carlos Hernández de Miguel, depués d’investigar aquella domina, diz que los prisioneros de la dictadura franquista yeren trataos como esclavos. Al paecer hebo 296 campos de concentración nos que pasaron casi un millón d'españoles. L’escritor recoyó les palabres de dellos presos que s’alcordaben del mieu que sentíen a morrer en cualquier momentu, n’especial peles nueches cuando “veníen a buscalos pa una saca”, lo que significaba qu’acabaríen baxo tierra en cualesquier cuneta.

Asina pues, señora Ayuso, espero qu’en Madrid la ciudadanía sepa diferenciar entre persones como usté y los ultras colos que gobernaría qu’almiren a la xentecaya como’l verdugu que condenaba a intelectuales nuna dictadura que suprimió los partíos políticos y la llibertá d’espresión, o persones como’l filósofu profesor Gabilondo, un sosu, intelectual y honestu que ta fechu de la mesma pasta que’l poeta universal del pueblu, un iconu de la llucha pola lliberta y los derechos. Los madrilanos deben tenelo mui presente a la hora d’escoyer qué partíos almiren el rexime franquista; ye dicir, represión, censura, falta de llibertá y antifeminismu, y qué partíos lleven nel so ADN la tolerancia, la lliberta, los derechos y el feminismu. Espero que’l nuevu presidente sienta con emoción les palabres d’un escritor y un home excepcional: Miguel Hernández.

Recomiendo a les persones que son como la señora Ayuso que llean los poemes del escritor del pueblu, un home excepcional que llevantó la voz escontra la dictadura d’un réxime que privó de llibertá, y de la mesma vida, a tantos homes y muyeres inocentes. La so llectura debería servir pa que se replanteguen la so inxusta ideoloxía y los pelligros que supón averase a una ultraderecha que se siente arguyosa d’unu de los episodios más aciagos de la historia d’España. 

Que mi voz suba a los montes

y baje a la tierra y truene,

eso pide mi garganta

desde ahora y desde siempre

Tristes armas

si no son las palabras

El odio se amortigua

detrás de la ventana.

Será la garra suave.

Dejadme la esperanza.

Si me muero, que me muera

con la cabeza muy alta.