Polítiques culturales y artístiques n´Asturies: La impotencia

Tamos fartos, y fartes, de tener de tar siempres tres de les coses. Lluchando escontra xigantes de mármole que coles sos macetes arremeten persistentemente escontra la cultura y escontra les artes.

Nun paez ser abondo que l'artista viva en situación de precariedá ya inseguridá xurídica ensin marcu dengún que lu protexa o-y xenere derechos. Paez que tovía tien d'autoentendese cola frivolidá de pescanciar, o a lo menos tener interiorizao, que l'artista nun trabaya, sinón que la so espresión ye más o menos equiparable a un hobby, que gratifica, pero que nun tien por qué tar venceyada, esa actividá, a la desixencia d'un sueldu y unes condiciones afayaíces.

Claramente, tien una proyeición social importante y nidiamente la cultura y l'arte podríen ser consideraos como derechos sociales, pero ello nun significa que nun se tea faciendo un llabor, un trabayu. Un trabayu que requier formación (seya rieglada o non), que requier hores de composición ya igualmente hores de preparación, entrenu y práutica.

Asturies podría ser una xoya nesti sen. Un espaciu que combinare l'actividá artística propia cola bienllegada d'otres partes del mundiu; un espaciu d'intercambiu ente lo llocal y lo global; un llugar exemplu nel tratamientu de la so cultura y el so arte; un sitiu atractivu pal ñatible como pal foriatu; un País de Cultura y Arte que s'amosare referencia pol so vagaxe na materia y pola calidá de les sos obres.

Asturies podría tar marcando camín, y lloñe d'ello, la comparanza ente los años 80 y los actuales, faen que percibamos precisamente tolo contrario: Qu'Asturies ta rezagada, pero tamién que fexo por talo. Los socesivos gobiernos d'Asturies foron siempres escontra les pequeñes manifestaciones artístico-culturales de pequeñu formatu centrándose en proyeutos grandones, n'eventos masivos, en grandes obres contraries na evidencia a la rentabilidá (y equí falo del padremuñu artísticu arquiteutónicu con obres como'l Niemeyer d'Avilés o'l Calatrava d'Uviéu). Y non solo porque la rentabilidá pudiere non ser económica-monetaria, sinón porque estrema d'una rentabilidá igualmente sociocultural.

Y too ello teniendo en cuenta qu'Asturies tien una tradición artística d'importancia, y por embargu, tol mundiu fadrá alcordanza de la moda de va unos años onde se prohibía cantar en chigre, sacantes aquellos llocales onde s'especificaba que sí se podía cantar. Autocensurámonos y prohibimos espresiones culturales propies... Dalgo demencial y qu'amuesa un cosmopaletismu y un "civismu" impropio de la nuesa manera de ser que coneuta más cola universalidá recurrente de lo Rural que ye onde más cercano ta la vida, onde menos cementu y formigón resequen les mentes.

Siendo, asina, un territoriu cuya proyeición artística tien rangu universal, si mos fixamos por exemplu nel calter d'importancia que tien l'arte rupestre asturianu; l'arte prerrománicu; la tonada y el baille; la fusión entamando por Camaretá-Nuberu hasta la performatividá de Rodrigo Cuevas; l'agrorock de Los Berrones; los romances, cuentos y lleendes qu'asombren pola so maxa a bien de turistes -yá que nós nun facemos casu a lo de nueso y sí a la opinión del turista de turnu...-; les bandes de folk astur que trunfen en festivales equí y acullá; la lletrónica propia de Xera; l'arte espuestu n'horru; el padremuñu industrial de Vaquero Palacios; abondes obres lliteraries tanto n'asturianu como en castellán; representaciones teatrales; la fotografía de Xurde Margaride; obres cinematográfiques combayaes nel esterior y en parte anubríes nel intrerior, como les de R. Lluis Bande... En fin que nun ye que seyamos un erial o un espaciu desiertu de creatividá.

Evidentemente toi numberando lo más conocío porque quiciás yá nin no evidente somos quien a  reconocenos, pero faltaría una bona montonera de proyeutos y artistes más o menos consagraos pero que col so llabor dinamicen la vida cultural y social asturiana.

Poro, los nuesos artistes y la nuesa cultura como pueblu vense continuamente enfrentándose a la inaición gubernamental o al constreñimientu institucional.

Y yá más concretamente falando de les actuaciones musicales que batallen cuantayá col Gobiernu, ye ineludible que faigamos por cambiar la Llei d'Espectáculos autonómica y aventuranos a dir desenrollando, mientres que nel Estáu nun s'avance cola Llexislación que conforme un Estatutu del Artista, nun marcu que protexa na trensición la creación, producción, distribución y accesu tanto a la cultura, como al arte específicamente falando.

Nun pue ser que se siga argumentando que se necesita consensu pa camudar esa Llei d'Espectáculos funesta. Esi argumentariu ta yá desfasáu. Lo que se necesita ye compromisu políticu per parte d'un Gobiernu que se-y reconoz la so grandona inutilidá. Onde la máxima paez siempres averase a la pasividá y a la espera. Mui na llinia de Rajoy cuando tomaba la decisión de nun tomar denguna.

Demientres, los Ayuntamientos, más alló de declaraciones institucionales instando al Gobiernu Autonómicu a tomar cartes nel asuntu y camudar la Llei, tendríen de tar diseñando Programes Culturales propios que xeneren marcos y espacios de proteición, siguiendo na llinia que Tres Buitres, ente otros, tuvieron proponiendo nos estremaos conceyos, surdiendo d'esi llabor el Programa Siente Xixón que foi tou un ésitu.

De la mesma manera que tendríemos de tar mirando quiciás, y falando específicamente de Xixón, de soprimir dalgún de los macroeventos (que ca vuelta paez haber más), y qu'esi montante sirva pa potenciar l'arte propio y d'un accesu más fluyíu, que xenere mayor empatía y diálogu ente l'artista y el públicu.