Cine, llingua de signos y cultura popular nes xornaes internacionales de l'Academia de la Llingua

s.d.m.

ACTUALIDÁ

Academia de la Llingua
Academia de la Llingua

La matrícula tará abierta del 21 al 31 d'ochobre

13 oct 2019 . Actualizado a las 05:00 h.

Cine, llingua de signos, gramática, cultura popular. L’Academia de la Llingua Asturiana completó un ampliu programa para les 38 Xornaes Internacionales d’Estudiu que se van celebrar n’Uviéu los díes 5, 6 y 7 de payares, na Facultá de Filosofía y Lletres. Una ventena d’actividades conformen el cartelu que yá ta disponible na web oficial de la institución.

A les persones matriculaes y qu’asistan a les Xornaes daráse-yos un certificáu acreitativu, asina que ye necesariu realizar una inscripción previa. La matrícula tará abierta del 21 al 31 d’ochobre. Les xornae desendolcaránse, nel Salón d’Actos de la Facultá.

La inauguración va ser el martes día cinco al mediudía. Va empezar con una presentación de les revistes Lletres Asturianes 121, n’edición dixital; Ciencies. Cartafueyos Asturianos de Ciencia y Teunoloxía 9, tamién n’edición dixital. La primera ponencia va correr a cargu de Ramón Lluís Bande, sol títulu Como una familia ensin álbum fotográficu. Una mirada a un cine nacional asturianu posible.

El xornaes van cuntar con presencia d’espertos d’otros países. Philipp Obrist, de la Universidá de Zürich; Antonio Romano, de la Universidá degli Studi di Torino; o los portugueses Lourdes Castro Moutinho y Rosa Lidia Coimbra, que van apurrir otru puntu de vista a temes sociales, culturales y hestóricos. La enseñanza de la llingua asturiana va tar presente gracies a la comunicación de Carlos Suari Rodrigue que va faer un repasu a Ventitrés años d’enseñu virtual del asturianu: carauterización, efeutos y perspeutives de futuru.

Van encetase otros aspeutos interesaos de la cultura popular. Por casu, José Enrique Gargallo Gil, de la Universidá de Barcelona, va pronunciar la ponencia Refranes meteorológicos del asturleonés en su contexto romance, según los datos de ParemioRom.